ரஞ்சி போட்டியில் ஜடேஜா | ஜனவரி 15, 2023

புதுடில்லி: இந்தியாவின் ஜடேஜா, தனது உடற்தகுதியை நிரூபிக்க ரஞ்சி கோப்பை போட்டியில் விளையாட உள்ளார்.

இந்திய அணியின் ‘ஆல்–ரவுண்டர்’ ரவிந்திர ஜடேஜா 34. கடந்த ஆண்டு வலது முழங்கால் காயத்துக்கு ‘ஆப்பரேஷன்’ செய்து கொண்ட இவர், தற்போது பெங்களூருவில் உள்ள தேசிய கிரிக்கெட் அகாடமியில் (என்.சி.ஏ.,) காயத்தில் இருந்து மீண்டு வரத் தேவையான பயிற்சி மேற்கொண்டு வருகிறார். இந்நிலையில் இவர், ஆஸ்திரேலியாவுக்கு எதிரான முதலிரண்டு டெஸ்ட் போட்டியில் பங்கேற்கும் 17 பேர் கொண்ட இந்திய அணியில் சேர்க்கப்பட்டுள்ளார்.

கடந்த ஆண்டு செப்டம்பர் மாதம் முதல் எவ்வித போட்டிகளிலும் பங்கேற்காமல் ஓய்வில் உள்ள ஜடேஜா, டெஸ்ட் போட்டிக்கான இந்திய ‘லெவன்’ அணியில் இடம் பிடிக்க உடற்தகுதியை நிரூபிக்க வேண்டியது அவசியம். இதனையடுத்து ரஞ்சி கோப்பை விளையாட திட்டமிட்டுள்ளார். வரும் ஜன. 24ல் சென்னையில் துவங்கவுள்ள தமிழக அணிக்கு எதிரான ரஞ்சி கோப்பை போட்டியில் சவுராஷ்டிரா அணி சார்பில் களமிறங்குகிறார்.

ஜடேஜா, இதுவரை 60 டெஸ்ட் (2523 ரன், 242 விக்கெட்), 171 ஒருநாள் (2447 ரன், 189 விக்கெட்), 64 சர்வதேச ‘டி–20’ (457 ரன், 51 விக்கெட்) போட்டிகளில் பங்கேற்றுள்ளார்.